Magaatubang sa media sa The Hague sa Netherlands si Vice President Sara Duterte, bwas, Marso 14.
Ini matapos ginsaylo ang iya amay nga si former President Rodrigo Duterte sa The Hague Penitentiary Institution agud mag-atubang sa hearing sa International Criminal Court (ICC).
Ginkumpirma sang Office of the Vice President nga naghugpa ang eroplano nga ginasakyan sang bise presidente las 9:27 p.m. sa Amsterdam, Netherlands ukon pasado alas-2:00 kaina sang kaagahon sa Pilipinas.
Natalana naman nga makigsapol ang bise presidente sa mga abogado kag naghingyo sang access sa iya amay nga sa subong preso sa The Hague samtang nagahulat sang iya hearing sa International Criminal Court para sa kaso nga “crimes against humanity” nga may kaangtanan sa war on drugs sang iya administrasyon.
Nahibaluan nga nagbyahe ang bise presidente sa Netherlands kahapon sang aga sakay sang Emirates Airlines.
Samtang ang iya utod naman nga si Davao City 1st District Representative Paolo “Pulong” Duterte ang ginhatagan man sang travel clearance para sa personal nga byahe sa Japan kag Netherlands.
Matandaan nga ang ila amay nga si former President Duterte ang gin-aresto sang Martes sang aga pag-abot niya sa Pilipinas halin sa Hong Kong.
Ang eroplano nga ginsakyan sini ang naghugpa sa Rotterdam The Hague Airport 11:54 kagab-i.
Gindala naman ini kag ginpreso sa The Hague Penitentiary Institution las 2:34 kaina sang kaagahon oras sa Pilipinas sakay sang itom nga mga salakyan.
