ILOILO – Ginpakigbahin sang dermatologist ang masami nga reklamo sang mga pasyente may kaangtanan sa pagbag-o sang color sang panit nga maeksperyensyahan sang madamo nga Pilipino.
Sa interview sang Bombo Radyo kay Dr. Aileen Montero, fellow sa Philippine Dermatological Society (PDS), ang pila sa mga nagapanguna nga kondisyon nga masami ireklamo amo ang melasma, hyperpigmentation, kag vitiligo.
Suno kay Montero, ang melasma ang isa ka kondisyon sa diin naga-angkon sang maitom nga patches sa nawong, ilabi na sa agtang, guya kag ilong.
Ini ang masami nga epekto sang pagbulad sa adlaw, hormonal changes, kag paggamit sang pila ka produkto sa panit.
Samtang ang hyperpigmentation ang nagatumod sa sobra nga produksyon sang melanin nga nagaresulta sang scar halin sa pilas, acne kag sobra nga init sang adlaw.
Isa man sa mga masami nga isyu amo ang vitiligo, isa ka autoimmune condition sa diin nagakapanas ang color sang pila ka bahin sang lawas.
Apisar nga indi man ini makalaton, apang mahimo ini makaapekto sa kumpiyansa sang isa ka tawo.
Panugyan sang eksperto, importante nga magkonsulta sa isa ka dermatologist agud makakuha sang insakto nga diagnosis kag pagbulong.
