Patigayunon subong nga adlaw ang hearing sang isa ka committee sa Senado kaangot sa pag-aresto kay former President Rodrigo Roa Duterte sa gahum sang arrest warrant sang International Criminal Court (ICC) bangud sa ginaalegar nga crimes against humanity.
Ang nagpatawag sini nga “urgent investigation” amo si Senator Imee Marcos nga magulang ni President Ferdinand Marcos, Jr. kag amo man ang nagatindog nga chairperson sang Senate Committee on Foreign Relations.
Malawig ang lista sang imbitado nga mga opisyal lakip na ang pinuno sang Department of Justice, Department of Foreign Affairs, kag Department of Defense.
Gin-imbitar man ang mga ahensya nga nag-implementar sang arrest warrant kaangay sang Philippine National Police.
Suno sa presidential sister, importante nga ma-establisar kun nasunod gid man ang due process sang gindakop si Duterte kag kun naprotektahan ang iya kinamatarong sa tunga sang involvement sang International Criminal Police Organization (Interpol) kag ICC.
Para kay Senator Bong Go nga long-time aide ni Duterte, ginaapresyar sini ang inisyatibo ni Imee apang nagsiling nga tuman na ini ka late bangud indi naman sini mabalik ang former president sa pungsod.
Kun mapabalik sang hearing si Duterte sa Pilipinas, bisan adlaw-adlawon pa ang Senate hearing suno pa kay Go.
Para naman kay Senate President Francis “Chiz” Escudero, kuntani makahatag sang “healing and unity” ang hearing nga ini nga pangunahan ni Imee, kag indi na matunga pa gid ang mga Pilipino.
Pahayag naman ni Palace Press Officer Undersecretary Atty. Claire Castro, hilway si Imee nga himuon ang imbestigasyon.
Sang ginpamangkot kun handa ang Malacañang magpadala sang mga tiglawas, ginsiling ni Castro nga “kun kinahanglan” kag kun ang inquiry ang himuon “in aid of legislation.”
Ginpasigurado man sini nga indi magpugong ang administrasyon nga magkadto ang resource persons sa amo nga hearing.
Nagapabilin subong ang former president sa detention facility sa The Hague, Netherlands. Gin-schedule ang confirmation of charges sa Septyembre 23, 2025.#
