Gin-appoint ang anay presidente kag chief executive officer sang Union Digital Bank nga si Henry Rhoel Aguda bilang bag-o nga secretary sang Department of Information and Communications Technology (DICT).
Ginpili ni President Ferdinand Bongbong Marcos Jr. si Aguda para islan si anay secretary Ivan John Uy nga naghalin sa pwesto sang Marso subong nga tuig.
Si Aguda ang anay parte sang Digital Infrastructure Lead ni Marcos sa Private Sector Advisory Council kag siya man ang may eksperyensya sa mga sector sang banking kag teknolohiya.
Nag-serbe man si Aguda bilang chairman sang board sang City Savings sa UBX Philippines, director sang Insular Health Care, BancNet, Metaverse Ventures and Platforms, sa Philippine Clearing House Corp.
Magluwas diri, nangin parte man siya sang software development services sa WeServ Systems International, nag-serbe bilang assistant vice president sa Bayantel Communication Holdings.
Nahibaluan nga nakuha ni Aguda ang iya degree sa mathematics halin sa University of the Philippines Diliman sang 1989 kag ang Juris Doctor halin sa UP Law sang 2008 — pareho nga cum laude.
Nakapasakop man siya sa Strategic Alliance Program sa Wharton School of the University of Pennsylvania kag nagakuha sang master’s degree in Applied Business Economics sa University of Asia and the Pacific.
(Article: Bombo Mae Joy Amora)
