Ginpakita ni eight-division world champion Manny Pacquiao ang iya pagdayaw kag respeto sa nagtaliwan nga American boxing legend nga si George Foreman.
Kahapon sang gin-anunsyo sang pamilya nga nagtaliwan na ang 76-anyos nga boxing great nga duha ka beses nga nag-hari sa heavyweight division.
Suno naman sa Pinoy boxing legend, tuman ka dalayawon ang karera ni Foreman kag ang iya nga kabakod sa ring ang naghatag inspirasyon sa madamo nga mga boksidor lakip na sa iya. Gindugang sini nga padayon gid nga dumdumon ang legasiya nga ginbilin ni Foreman bilang matuod nga kampyon.
“My heartfelt condolences go out to his family, friends, and all those whose lives he touched both in and out of the boxing world. Rest in peace, George. You will always be an icon,” kabahin sang pahayag ni Pacquiao, Marso 22.
Wala pa nabun-ag si Pacquiao sang naghari si Foreman sa heavyweight ranks, apang pila ka beses naman sila nga nagkitaay sang nasambit nga 1968 Mexico City Olympics gold medalist ilabi na sa United States.
Kilala man si Foreman sa “The Rumble in the Jungle” kaupod kay Muhammad Ali sang 1975, paglutos sini kanday Joe Frazier kag Ken Norton sang 1970s, kag ang epic one-punch knockout kay Michael Moorer nga amo ang naghimo sa iya bilang oldest heavyweight champion sa edad nga halos 46-anyos sang 1994.
Siya anay ang nagbayaw sa kamot ni Pacquiao kadungan sang promotional tour para sa sambuwa batok kay Brandon Rios sa Macau sang 2013.
Magluwas nga isa ka boksidor, nangin kilala man si Foreman bilang humanitarian kag isa ka businessman.
