Nagpanugyan ang dermatologist nga indi pagbalewalaon ang punggod bangud mahimo ini magresulta sang acne kag emotional nga epekto, ilabi na sa mga kabataan kag kababaihan.
Sa interview sang Bombo Radyo kay Dr. Elvie Dofitas, board-certified dermatologist sa Philippine Dermatological Society, iya ginpahayag nga ang punggod ang tuga sang pagbara sang hair follicles bangud sa oil kag patay nga skin cells.
Apisar masami ini nga nagaapekto sa mga teenager, mahimo man ini makaapekto sa mga may edad, ilabi na sa mga kababaihan nga naga-eksperyensya sang pagbag-o sang hormones.
Suno kay Dr. Dofitas, ang nagkalain-lain nga rason sa pag-angkon sang acne amo ang hormonal changes, bulong, stress, kag pagkaon sang may mataas nga carbohydrates kaangay sang tinapay, pasta, kag tsitsirya.
Gin-athag man sini ang pagpati sang publiko nga ang pagkaon sang tsokolate ukon mamantikaon nga pagkaon ang wala sang direkta nga epekto sa pag-angkon sang punggod.
Ginpanugyanan man sini ang publiko nga magkonsulta gilayon sa doctor agud malikawan ang permanente nga scar ukon hyperpigmentation.
