Gin-anunsyo ni Department of National Defense (DND) Secretary Gilberto Teodoro Jr. nga natalana nga pirmahan sang Pilipinas kag New Zealand ang visiting forces agreement (VFA) sa Abril subong nga tuig.
Suno kay Teodoro kadungan sang iya speech sa 49th founding anniversary event sang Western Command (WESCOM), natapos na ang diskusyon sa sini nga kasugtanan ukon ang Status of VFA (SOVFA).
Sa idalom sang 1987 Philippine Constitution, ginadumilian ang tropa sang iban nga pungsod nga mag-establisar sang permanent military bases diri sa Pilipinas.
Apang kun may mga kasugtanan kaangay sang VFA, pasugtan ang foreign militaries nga magsulod sa Pilipinas para sa sini nga aktibidad.
Ang Pilipinas kag ang United States ang may yara man sang VFA nga gin-umpisahan sang 1999 kag amo subong ang nagaserbe nga legal framework kun ngaa pwede makabisita ang US forces sang temporaryo sa Manila para sa military exercises kag agud maghatag man sang humanitarian and disaster-response assistance.
Sang 2007, may kaangay man sini nga kasugtanan nga napirmahan ang Pilipinas kag Australia.
Sining nagliligad lang nga tuig, talalupangdon nga mas ginpasangkad pa gid sang Pilipinas ang maritime and defense security cooperation kaupod sa iban nga pungsod bangud sa nagasaka man nga tension sa West Philippine Sea.
