Paghigugma, paghimakas kag determinasyon ang nangin sentro sang prestihiyoso nga Mister and Miss University of San Agustin (USA) 2025.
Ini matapos ginkoronahan ang real-life couple nga sanday Matt Andrew Daniel Sy Española kag Vjan Ylsaia Gallinero sa diin wala lang sila naghimo sang pangalan sa maragtas sang unibersidad, kundi mas ginpapag-on pa nila ang ila love story.
Si Española, nga Medical Technology student sa College of Pharmacy and Medical Technology, tumandok sang General Santos City ang indi na bag-o sa mga pageant, bangud nakapasakop na siya sa kaangay nga kompetisyon sang high school.
Samtang, si Gallinero, nga Nursing student sa College of Nursing, Nutrition, and Dietetics, ang ginkoronahan na bilang Miss 46th Carabao Carroza Festival Queen sang 2018, sa edad nga 16.
Sa interview sang Bombo Radyo kay Gallinero, iya ginpahayag nga wala nangin mahapos ang iya pagkuha sang korona.
Sang 2022, nagpasakop na siya sa Mister at Miss USA, apang nagtapos lang bilang 1st runner-up.
Sa pihak sang kahangawa, nagdesisyon siya nga magpasakop sa liwat kag matapos ang tatlo ka tuig, nagbunga ang iya pagtinguha.
Subong, bilang Miss USA 2025, katuyuan niya nga mangin inspirasyon sa iban samtang padayon nga ginatuman ang iya handom nga mangin isa ka registered nurse.
Para naman kay Española, mas nangin espesyal ang iya kadalag-an bangud kaupod niya ang iya girlfriend nga nagdaog.
Subong nga Mister USA 2025 na si Española, ginatutukan niya nga makatapos sa pagtuon agud mangin Medical Technologist kag sa ulihi, mangin isa ka doctor.
Ginpasalig man sini nga magahatag sila nga power couple sang inspirasyon sa sulod kag gwa sang unibersidad.
