Kumporme si Iloilo 3rd District Rep. Lorenz Defensor nga liwat mahatagan sang atensyon ang ginaduso nga anti-political dynasty bill sa kongreso.
May kaangtanan ini sa petition nga gin- file sa Supreme Court (SC) nga nagapangabay sa judiciary nga indi pagtolerar ang kongreso nga pabay-an lang ang pagdumili sa political dynasties nga nasaad sa 1987 Constitution.
Sa interview sang Bombo Radyo kay Rep. Lorenz Defensor, iya ginpahayag nga kinahanglan lang nga mangin balance ang pagdihon sang bill agud i-ban ang political dynasties sa pungsod.
Suno kay Defensor, dapat may depinisyon gid kun ano ang dynasty sa idalom sang layi nga ipasar sang kongreso kag bukas siya siya para diri ilabi na kun ang Supreme Court mismo ang mag-isyu sang mandamus.
Pahayag ni Defensor, may ginabanta nga 30 na ka mga pending bills angot sa anti-dynasty law kag tion na nga seryosohon ini.
Dugang niya, samtang wala pa sang maathag nga depinisyon kun ano ang dynasty, mangin mabudlay ang pag-exercise sang democratic process ilabi na sa mga opisyal ang gobyerno nga magpamilya.
Suno sa iya, kinahanglan nga mangin rasonable ang depinisyon agud indi man madalukan sang kinamatarong ang indibidwal nga magsulod sa public service.
