Patigayunon subong nga adlaw, Abril 3, ang ikaduha nga hugnat sang hearing sa Senado nga naangot sa pag-aresto kay former President Rodrigo Roa Duterte bangud sa iya kaso sa International Criminal Court (ICC).
Suno sa presidential sister nga si Senator Imee Marcos nga amo ang chairperson sang Senate Committee on Foreign Relations, madayon ang inquiry bisan magatambong man ukon indi ang iya gin-imbitaran nga mga miyembro sang Gabinete.
Una na sini ginpahayag nga nakulangan siya sa mga impormasyon nga iya natipon sang una nga hearing sang Marso 20 gani nga nagpatawag ini liwat sang bag-o nga inquiry.
Wala pa napaguwa sang iya nga opisina ang line-up sang resource persons subong nga adlaw, apang kun basehan ang iya una nga statement, ginalauman nga may legal experts nga posible mga retired justices.
Una na nga nagpadala sang sulat si Executive Secretary Lucas Bersamin nga indi na liwat magtambong ang Cabinet officials, apang nagsulat-balik si Imee sa Palasyo sang Abril 1 kun pwede nga mahatagan sang konsiderasyon kag pakadtuon ang mga tiglikom sang ahensya para sa scheduled hearing.
Ginsiling ni Imee nga wala sang supisyente nga rason nga magpangindi ang executive officials, bisan pa nga ginsiling na ni Bersamin nga nahatag na sang Cabinet kag iban nga pertinent officials ang kinahanglanon nga mga impormasyon sang nagtambong sila sa inquiry sang Marso 20.
Sa bahin ni Presidential Communications Undersecretary Claire Castro, ginsulit man sini nga nahatag na sang Cabinet officials ang ginapangayo sa mga pagpisa-pisa sang Senate panel, kag naka-release na gani ang senadora sang iya nga preliminary findings.
“Nothing was hidden, because the long hours of the first hearing were enough to say what our Cabinet officials have to say with regard to the surrendering of former president Duterte to the ICC,” suno sa Palace press officer.
“We cannot claim that the questions in aid of legislation were not answered. Probably, the things that our Cabinet officials said are enough to come up with a law related to this (issue),” dugang sini.
Nahibaluan nga vocal si Imee sa iya pagsuporta sa former president kag kay Vice President Sara Duterte nga iya abyan. Kasunod sang iya ginpatigayon nga hearing sang Marso 20, wala na ang iya pangalan sa campaign speech sang iya utod nga si President Bongbong Marcos sa mga rally para sa midterm elections, kag sang damlag lang, gin-anunsyo sang senadora nga pormal na ini nga nag-withdraw sa Alyansa para sa Bagong Pilipinas nga senatorial slate sang Marcos administration.#
