Ginpaathag sang tiglikom sang Department of Agriculture (DA) nga mahimo nga mangin pabor pa sa Pilipinas ang bag-o nga taripa nga ipatuman sang Estados Unidos sang Amerika.
Suno kay Agriculture Secretary Francisco Tiu Laurel Jr., mas manubo ang taripa nga gin-implementar sa Philippine agricultural exports ipaanggid sa iban nga mga pungsod sa Southeast Asia.
Partikular sini nga ginmensyonar ang Indonesia, Vietnam, kag Thailand nga amo suno sa iya ang competitor sang Pilipinas. Mahimo nga makabenepisyo ang Pilipinas diri suno kay Laurel, bangud kun makit-an sang US importers nga mas manubo ang taripa sa Pinoy products, mahimo nga magliso sila sa Pilipinas sa baylo nga mag-import halin sa iban nga ASEAN countries.
“As far as agriculture is concerned, technically, ang competitor natin is basically Indonesia, Vietnam, Thailand, and other ASEAN countries to the US. At base sa nakita kong tariff rates, tayo pinakamababa eh. Isa sa pinakamababa among our neighbors,” suno kay Laurel.
Ginhalimbawa sini ang tilapia nga may 17% tariff, samtang 46% ang taripa sa Vietnam nga amo ang major supplier, kag 34% naman sa Thailand.
“Kung isda, definitely kung sinasabi natin tilapia, kung 17 percent lang tariff natin ng tilapia na fillet o kaya whole sa Amerika, tapos ang Vietnam which is a major supplier at 46 percent, and Thailand at 34 percent, mas lamang tayo,” suno sa tiglikom.
Nahibaluan nga lakip sa gina-export sang Pilipinas sa US amo ang niyog, ang tuna, kag iban pa nga mga isda.
“I have given instructions to look at the whole product range na natin, na ang in-export natin, kung ano man yung tatamaan. But in general, I think it’s more positive than that,” dugang sini.
Sa pihak nga bahin, nagpahayag naman si Trade Secretary Ma. Cristina Roque nga maid-id nga gina-monitor sang Department of Trade and Industry (DTI) ang potential impact sa ekonomiya sang Pilipinas kasunod sang imposition sang US reciprocal tariffs sa Philippine goods.
Kabahin ini sang “reciprocal tariff” policy nga gin-anunsyo ni US President Donald Trump nga mangin epektibo sa Abril 9 sa masobra 100 ka mga pungsod. Sa Truth Social page ni Trump, ang mga produkto halin sa Pilipinas nga magasulod sa America ang dagdagan sang 17% tariff—nga makabig pa nga “discounted” reciprocal tariff ipaanggid sa 34% rate nga gina-charge sang Manila charges sa goods nga halin sa USA.#
