Arestado ang isa ka barangay kagawad sang Barangay Rizal, La Paz, Iloilo City matapos nga ginapahayag nga nanghurikap sang pribado nga parte sang lawas sang menor-de-edad.
Ang kagawad amo si Jolly Penasales, samtang ang biktima amo si Alyas Alex, 14-anyos.
Sa interview sang Bombo Radyo kay Police Major Tranquilino Querubin, Chief of Police sang La Paz Police Station, iya ginpahayag nga las-8 sang gab-i sang Sabado, Abril 5, 2025 sang natabo ang insidente sa isa ka sari-sari store.
Suno kay Querubin, samtang nagapungko ang biktima, hinali nga ginhurikap sang kagawad ang pribado nga parte sang lawas sini.
Gintuad man sini nga natigayon na nga mapasaka ang kaso nga acts of lasciviousness ukon paglapas sa Republic Act No. 7610 batok sa opisyal.
Ginhatagan naman sang psychological attention kag ginpaidalom sa nagakaigo nga pagbulong ang menor-de-edad.
Nagdepensa naman ang kagawad nga wala sini nahibaluan nga nahimo sini ang amo nga akto bangud sa yara siya sa impluwensya sang makahulubog nga ilimnon.
