Ginpaidalom sa psychiatric evaluation subong nga adlaw ang lalaki nga nagtuyo nga mag-vlog sa ibabaw sang signage tower sang Plazuela De Iloilo sa Mandurriao, Iloilo City.
Ini amo si Alyas Joms, residente sang Janiuay, Iloilo kag isa ka vlogger.
Sa interview sang Bombo Radyo kay Police Lieutenant Cosmeflor Marco, Jr., Deputy Chief of Police sang Iloilo City Police Station 10, iya ginpahayag nga ginpaidalom na sa psychiatric evaluation ang vlogger sa Western Visayas Medical Center – Psychiatric Section.
Suno kay Marco, gin-updan ang vlogger sang Women and Children’s Protection Desk (WPCD) kag sang iya utod nga babaye sa nasambit nga hospital.
Kon makumpirma naman nga nagasuprer ang vlogger sang depresyon, gilayon ini i-refer sa Department of Social Welfare and Development (DSWD).
Ginkumpirma man sini nga ginpabulong man ang anak sang vlogger nga una na gintuad niya nga may sakit sa tutonlan.
Kon balikan, napuhag ang mga tawo kahapon nga adlaw ang pagsaka sang vlogger sa signage tower kon sa diin, gilayon man nga ginrespondehan sang Bureau of Fire Protection (BFP) kag sang kapulisan.
