Ginbulgar ni Ukrainian President Volodymyr Zelensky nga indi lang North Korean soldiers ang nagabulig sa Russia sa gyera sa Ukraine kundi pati mga Chinese nationals.
Ginpahayag ini sang Ukrainian leader kadungan sang pagtilipon sang mga hepe sang military sa Brussels, Belgium.
Suno kay Zelensky, nakabaton siya sang impormasyon nga ginatos ka mga Chinese ang yara sa patag-awayan bilang parte sang occupation forces sang Russia. Dugang niya, nagakahulugan ini nga tuyo gid sang Moscow nga palawigon pa ang gyera nga subong tatlo na ka tuig.
“As of now, we have information that at least several hundred Chinese nationals are fighting as part of Russia’s occupation forces,” suno sa Ukrainian leader. “This means Russia is clearly trying to prolong the war — even by using Chinese lives.”
Antes sini nga pahayag, may nauna na nga statement ang Kyiv nga may nadakpan sila nga duha ka Chinese nationals sa eastern Donetsk region nga nagapakig-away para sa Russia. Ini nga statement ang nagbukad sang alegasyon ni Zelensky nga gina-upod naman sang Moscow ang Beijing sa gyera.
Ginpanginwala naman sang Kremlin ini nga alegasyon, kag nagpaandam naman ang China batok sa mga partido nga nagahimo suno sa ila sang iresponsable nga mga pahayag.
Kaangot diri, liwat man nga nagpanawagan si Zelensky sang dugang nga air defense systems matapos ang insidente sang nagligad nga semana sa iya hometown sa Kryvyi Rig kun sa diin may ginpalupad nga Russian ballistic missile nga nagpatay sang 19 ka mga tawo lakip na ang siyam ka kabataan.
Antes naglutaw ang gina-alegar partisipasyon sang Chinese nationals, nauna na gin-claim sang South Korean military nga nagdugang pa gid ang North Korea sang 3,000 ka mga soldado agud magbulig sa Russia.
Magluwas pa ina sa 11,000 ka mga tropa nga nauna na ginpadala sang Pyongyang suno sa South Korea Joint Chiefs of Staff kun sa diin 4,000 na ang gin-alegar nga napatay kag nasamaran sa tunga sang gyera.
