Liwat nga nagpahanumdom ang Commission on Elections (Comelec) nga hugot nga ginadumilian ang pagpangampanya sang mga kandidato subong nga Huwebes Santo kag buwas, Byernes Santo.
Suno kay Comelec chairman George Garcia, indi man pwede ang anuman nga partisan activities sa sini nga mga balaan nga adlaw para sa Kristiyano nga Katilingban.
Wala sang problema suno sa poll body kun magbisita sa mga simbahan ukon magtambong sa importante nga mga aktibidad ang mga kandidato, apang indi lang magkampanya bisan pa sa social media.
Pananglitan indi magsunod sa sini nga patakaran, mahimo mangatubang ang kandidato sang disqualification case.
“I hope politicians will respect these religious activities and religious things that we consider important for our Catholic Christians. That is in the election law itself, that is an election offense, so that is also a ground to disqualify the candidate,” suno sa poll body chief.
“Let’s use social media to post what we see is wrong, especially on Thursday and Good Friday, where campaign activities are not allowed. We also ask all those who are vying for national and local posts to be wary of the actions of their opponents,” dugang sini.
Ang paglapas sa sini nga pagsulundan ang makabig sang Comelec nga election offense nga mahimo masilutan sa idalom sang Section 263 kag 264 sang Omnibus Election Code (OEC).
