Ginpahayag sang Commission on Elections Region 6 ukon COMELEC 6 nga nagsugod na ang nagkalain-lain nga prohibition ukon banning period nga may kaangtanan sa naka-schedule nga Barangay kag Sangguniang Kabataan elections (BSKE) 2026 sa Nobyembre 2.
Sa interview sang Bombo Radyo kay Atty. Wil Arceño, Assistant Regional Director sang COMELEC 6, iya ginpahayag nga nagsugod sang September 18 ang prohibition sa release kag disbursement sang pondo para sa social welfare and services kag iban pa nga housing-related projects.
Suno kay Atty. Arceño, nagsugod man ang prohibition sa appointment ukon hiring sang bag-o nga empleyado, creation sang bag-o nga positions, promotion kag salary increases.
Apang, pahayag niya, mahimo gihapon makapangayo sang exemption ang concerned government agency ukon local government unit sa COMELEC para mapadayon ang ila mga social services, projects kag iban pa nga ginaplano nga personnel actions.
Ginpahayag man ni Atty. Arceño, kon mapostpone ang eleksyon, kinahanglan nga i-reset ang amo nga banning period.
Dugang pa niya, kon ma-postpone ang eleksyon, mahimo magbag-o ang timeline sang mga preparasyon kag mga prohibition, apang ang COMELEC yara lamang sa pagpatuman sang mando nga magahalin sa nagapamuno sa election law ukon sa nagkalain-lain nga proseso sang gobyerno.
