Gin-terminate na ang tanan nga mga aktibidad nga naangot sa 2026 Barangay and Sangguniang Kabataan Elections (BSKE) matapos nga ginpirmahan ni President Ferdinand “Bongbong” Marcos Jr. ang hagna nga naga-postpone sang piniliay.
Sa interview sang Bombo Radyo kay Atty. Dennis Ausan, director sang Commission on Elections (Comelec) Western Visayas, iya ginpahayag nga sandig sa instruction halin sa central office, opisyal na nga gin-untat umpisa subong nga adlaw ang amo nga mga aktibidad.
Lakip sa ginkansela ang filing sang certificates of candidacy nga matabo kuntani sa Septyembre 28 tubtub Oktubre 5.
Lifted naman ang mga prohibition sa social services kag public works.
Suno sa Comelec, maga-resume ang poll body sa registration sang voters sa Nobyembre kag magatakop sa Hulyo 30 sa masunod nga tuig.
Septyembre 24 sang ginpirmahan ni Marcos ang Republic Act 12326, apang ginpahibalo lamang ini sa publiko kaina. Paagi sa amo nga layi, ginpasaka man sa lima ka tuig ang termino sang mga opisyal sang barangay kag SK.
Nauna na nga ginpahayag sang beterano nga election lawyer nga si Atty. Romulo Macalintal nga may intensyon ini nga ipasaka ang isyu sa Korte Suprema.
“With due respect, the President was ill-advised in signing this law. The administration failed to realize—or conveniently ignored—the compounding effect of this measure: a massive three-year total postponement of the Barangay and Sangguniang Kabataan Elections (BSKE) and a corresponding three-year unauthorized term extension for incumbent officials,” kabahin sang iya statement.
Para sa abogado, ang three-year hiatus amo ang nagkakas sa minilyon ka mga Pilipino sang ila fundamental right of suffrage.
“Because this measure strikes at the heart of our democracy and reflects a grave abuse of discretion, voters like me are left with no choice but to bring this matter before the Supreme Court via a Petition for Certiorari,” suno sa election lawyer.#
