Naghabuyanay sang akusasyon ang Russia kag Ukraine batok sa isa kag isa nga mansig lapas ang mga ini sa ginpatuman nga isa ka adlaw nga ceasefire.
Suno kay Ukrainian President Volodymyr Zelenskiy, nagapakuno-kuno lang ang Moscow nga naga-obserbar ini sang kalinong sa Easter. Sa pagkamatuod suno sa iya, 46 assaults ang ginlunsar sang Russians lakip na ang heavy weapons.
Suno naman sa Russian Defense Ministry, ang Kyiv amo ang wala nagsunod sa ginhambalan, bangud masobra 1,000 ka beses ini nga naglapas sa ceasefire nga rason sang halit sa imprastraktura kag pagkapatay sang mga sibilyan.
Gindugang sang ministry nga 444 ka beses nga gin-igu sang Ukraine ang Russian positions kag masobra 900 ang ila drone attacks lakip na ang pag-atake sa Crimea kag Russian border areas sang Bryansk, Kursk kag Belgorod regions.
Matandaan nga si Russian President Vladimir Putin ang nagdeklarar sang isa ka adlaw nga untat-away kadungan sang pag-obserbar sang Domingo sang pagkabanhaw — buot silingon, wala sang military activity sa front lines tubtub nga magtakop ang Domingo.
