Nagpalab-ot sang iya pagpakig-unong sa kasubo si House Speaker Ferdinand Martin G. Romualdez matapos mabalitaan ang pagtaliwan ni Pope Francis, nga ginkilala niya bilang isa ka huwaran sang pagkamaluloy-on kag mapisan nga lider, nga naghatag sang paglaum sa mga tawo sa bug-os nga kalibutan, labi na gid sa mga Pilipino nga masami nagatawag sa iya nga “Lolo Kiko.”
Nadumduman man ni Romualdez ang pagbisita sang Santo Papa sa Tacloban bisan pa sa mabaskog nga ulan kag indi maayo nga panahon. Ang nasambit nga pagbisita, suno sa iya, amo ang isa sa mga pinakamanami nga simbolo sang pagpakig-upod kag pagpalangga sang Santo Papa sa mga tawo.
Ginpahayag pa ni Speaker Romualdez nga si Pope Francis ang naghatag sang inspirasyon sa ila agud magpadayon sa kabuhi pagkatapos sang trahedya nga gindala sang Bagyong Yolanda.
Ginkilala sang House leader nga ginsabuhay ni Pope Francis ang espiritu sang isa ka matuod-tuod nga lider, isa sa nagapakigbahin sa kabudlayan sang mga imol, masakiton, kag mga indi ginakilala sang katilingban. Indi lang siya naga-ampo kundi naga-obra man sang mga tikang para sa kaayuhan sang tanan.
Dugang pa ni Romualdez, ang kamatayon ni Pope Francis isa ka mabug-at nga kabudlayan, indi lang para sa mga Katoliko kundi para man sa tanan nga tumuluo nga nakabatyag sang kusog kag paglaum sa iya mga pulong kag buhat.
