Naghingyo ang grupo sang mga mamumugon nga makig-istorya kay President Ferdinand “Bongbong” Marcos, Jr. kaangot sa pending gihapon nga mga hagna sa Kongreso nga ginduso agud pasakaan ang sweldo sa pribado nga sector.
Ginpasa sang National Wage Coalition ang ila sulat kay Labor Secretary Bienvenido Laguesma kahapon agud nga ma-facilitate sini ang dayalogo sa tunga sang Presidente kag sa labor sector.
Ini nga koalisyon ang ginabug-usan sang Bukluran ng Manggagawang Pilipino, Kilusang Mayo Uno, Nagkaisa kag Trade Union Congress of the Philippines.
Ginsiling sang grupo nga ang wage hike ang isa ka bagay nga ginadalian gid sang Filipino workers. Pananglitan matabo ini nga istoryanay, mabatian ang sentimyento sang mga mamumugon antes ang Labor Day sa Mayo 1.
Una na nga ginpahayag sang president nga seryoso pa nga ginarepaso ang ginaproponer nga P200 daily pay hike. Matandaan nga naaprubahan na sang House Committee on Labor and Employment ang substitute bill nga nagaduso sang P200 daily across-the-board wage increase para sa private sector workers.
