Nagpanugyan ang isa ka dermatologist sa publiko nga himuon gid nga prayoridad ang paghatag sang proteksyon sa panit subong nga tag-ilinit.
Sa interview sang Bombo Radyo kay Dr. Ma. Grace Gallega-Perez, iya ginpahayag nga ini agud nga makalikaw sa mga balatian ukon kondisyon sa panit nga mahimo mangin resulta sang sobra nga exposure sa silak sang adlaw.
Ini nagalakip sang premature skin aging, skin cancer kag iban nga skin diseases.
Suno kay Dr. Perez, isa ka simple nga pamaagi sa pagprotekta sa panit amo ang pagbutang sang sunscreen nga amo ang naga-filter ukon naga- screen sang UltraViolet rays sang adlaw.
Ang gamiton nga sunscreen ang dapat nga broad-spectrum protection, Water resistant, kag Sun Protection Factor ukon SPF 30 ukon mataas pa.
Pahayag sang dermatologist, ang sunscreen dapat gina-apply sa panit nga wala matabunan sang bayo sang 15 minutos antes maggwa sa balay, mag-apply kada duha ka oras matapos maligo ukon magpamalhas.
Mas mayo man nga mag-apply bisan tig-ululunan.
Pahiran man ang bibig sang lip balm nga may sunscreen.
Gin-athag man sang doctor nga safe ang tanan ng sunscreen bangud wala sang ano man nga harmful ingredients sa sunscreen nga mabakal subong sa merkado.
