Nakuhaan sang illegal nga droga ang 15-anyos nga menor de edad sa ginpatigayon nga buy bust operation sang Iloilo City Police Station (ICPS) 9 sa Brgy. Maria Cristina, Jaro, Iloilo City.
Ang subject amo si Alyas Bert, residente sang Brgy. San Isidro, Jaro, Iloilo City.
Sa interview sang Bombo Radyo kay Police Major Eduardo Siacon Jr., hepe sang Police Station 9, iya ginpahayag nga natigayon nila maka-transaksyon ang subject paagi sa online kag suno sa iya ulihi na nga nahibaluan nga menor de edad ang subject.
Naglab-ot sa isa ka semana ang monitoring sa subject kun sa diin wala ini sang previous nga record.
Wala naman gintuad sang subject kun diin ini nagakuha sang supply kag direkta ini nga nagakadto sa iya ang ginabaligyaan sang illegal nga droga.
Natigayon nga makuha sa iya paghinakop ang 3 tanan nga gramo sang suspected shabu nga may standard drug price nga 20,400.
Sa subong, yara ini sa kustodiya sang balay dalayunan matapos ginturn- over sang kapulisan samtang nga ginahulat ang resulta sang drug test.
Padayon ang imbestigasyon sang kapulisan kun sin-o ang mga koneksyon sang menor de edad.
