Nagpasalig si President Ferdinand Marcos Jr. subong nga Labor Day sa mga mamumugon nga ang gobyerno mangin ila “aktibo nga kaupod.”
Suno kay Marcos, ang Labor Day isa ka tsansa agud makahimo sang konkreto nga mga tikang agud masabat ang mga kinahanglanon sang mga pamilya nga Pilipino, masiguro ang kaluwasan sa ulubrahan, kag maamligan ang mga kinamatarung.
Una na nga ginpahayag sang Department of Labor and Employment (DOLE) nga magatanyag ini sang 216,144 ka mga trabaho sa ila Labor Day fairs.
Gin-anunsyo man ni Marcos Jr. nga ang mga commuters pagahatagan sang libre nga sakay sa linya sang MRT kag LRT sa Abril 30 tubtob Mayo 3 bilang pagmarka sang Labor Day sini nga tuig.
Ginpalab-ot naman ni Vice President Sara Duterte ang iya pagdayaw sa tanan nga mga mamumugon nga Pilipino subong nga Labor Day, bilang pagkilala sa ila pagpangabudlay kag kabakod sa pihak sang pagpanghangkat sang kabuhi.
Sa iya video message, ginhatagan pagtamod ni Duterte ang importansya sang kontribusyon sang mga overseas Filipino workers (OFWs), mga medical kag security frontliners, community workers, mga manunudlo, kag iban pa nga mga mamumugon sa pribado kag pampubliko nga sektor.
Nagpabutyag man siya sang pagdayaw sa “kalig-on, kaalam, kag kapisan” sang mga mamumugon sa ila nagkalainlain nga patag, sa sulod man ukon sa guwa sang pungsod.
Ang Mayo 1 ginasaulog kada tuig bilang Labor Day kag gindeklarar nga regular nga holiday paagi sa Proclamation No. 727.
