Ginkumpirmar ni Department of Transportation (DOTr) Secretary Vince Dizon nga indi hungod ang natabo sa NAIA Terminal 1 sa syudad sang Pasay base sa inisyal nga imbestigasyon kag CCTV footage.
Suno sa iya, may pasahero ang driver nga ginkilala kay Leo Gonzales antes ini gin-arado sang SUV nga gilayon nga ginkumpirma sang driver kag ginpahayag nga nagpanic lang ini bangud may salakyan nga nagtabok sa dalan kag sa baylo nga magpreno, gintapakan niya ang accelerator.
Samtang, yara na sa kustodiya sang Philippine National Police (PNP) ang driver kag padayon nga ginapaidalum sa imbestigasyon sa pagpanguna ni PBGen. Christopher Marcial Abecia.
Nahibaluan nga nagresulta sa kahalitan ang insidente, sa diin duha ang patay lakip na ang 4-anyos nga bata nga babaye, samtang tatlo naman ang pilason.
Padayon nga ginabulong sa ospital ang mga biktima nga nag-angkon sang pilas kag bali.
Ginpasalig ni Dizon nga sabton sang kumpaniya ang gasto sa pagpabulong sang mga napilasan kag ang paglubong sang mga napatay.
Gina-analisar naman ang kuha sang CCTV agud mahibaluan ang matuod nga gintunaan sang insidente. Ipaidalum man sa mandatory drug test ang driver.
Sa pihak nga bahin, nagpanawagan naman si Dizon sa publiko nga respetuhon ang mga biktima kag likawan ang pagpost sa social media sang mga sensitibo nga video ukon litrato sang insidente para lamang sa pagdugang sang views.
