Nagpanawagan si Presidente Ferdinand Marcos Jr sa mga botante nga Pilipino nga magpili sang mga lideres nga may integridad, may ikasarang, kag may pag-ulikid sa mga pumuluyo.
Gin-engganyo man sang Presidente ang tanan nga rehistrado nga botante nga gamiton ang ila kinamatarong sa pagboto.
Sa idalum sang Proclamation No. 878, gindeklarar ni Presidente Marcos ang Mayo 12, 2025, buwas nga Lunes, bilang isa ka special non-working holiday agud ang tanan nga rehistrado nga botante ang makaboto sa national and local elections.
Gin-engganyo sang Presidente ang mga botante nga magpili sang mga kandidato nga may pag-ulikid, may ikasarang, kag may kombiksyon bangud sa husto nga pagpili, ululupod nga matukod ang Bag-o nga Pilipinas.
Ginpasalig naman ni Presidential Communication Secretary Jay Ruiz sa publiko nga hugot nga nagakoordinar ang nagkalain-lain nga ahensya sang gobyerno sa mga stakeholders agud masiguro nga ang 2025 midterm elections mangin tampad, matawhay, kag malinong.
Ginpahayag ni Ruiz nga kinahanglanon ang credible elections sa pagtukod sang digitally empowered democracy kun sa diin ginasakdag ang transparency kag trust.
Si President Ferdinand Marcos Jr. nagmando man sa Department of Information and Communications Technology (DICT) kag sa Commission on Elections nga magtukod sang 24/7 nga threat monitoring center agud masiguro ang matinlo kag tampad nga eleksyon sa Lunes, Mayo 12, 2025. Mga kagamitan sa isports
Amo ini ang una nga 24/7 Threat Monitoring Center nga may real time digital command post.
Suno kay Palace Press Officer USec. Claire Castro, tinutuyo sang nasambit nga monitoring center nga matumod, matapna kag matapos ang online misinformation kag disinformation.
Bilang sabat, ginpasangkad sang Philippine National Police ang pagbantay sa mga kaso sang vote buying.
Sa amo man nga tion, ang tagsa ka Regional Director naga-assign man sang mga field commander sa ila tagsa ka lugar sang operasyon agud magbantay sa tagsa ka lugar.
Ang tagsa ka istasyon sang kapulisan sang PNP may isa ka tawo nga gin-assign sa pagbantay sa vote buying.
Sa subong, ginatos ka mga kaso sang vote buying ang gina-imbestigaran sang Kontra Bigay Committee nga gintukod sang komisyon, antes ang May 12 elections.
