Ginpirmahan ni Iloilo Governor Arthur Defensor Jr. ang Executive Order No. 42 para sa province-wide post-election cleanup campaign nga may tigulo “Limpyo Eleksyon for MoRProGRes.”
Ang order ang nagaduso sa tanan nga mga kandidato, partido, kag mga organisasyon nga may listahan sang partido nga nagpasakop sa 2025 elections nga kuhaon kag ihaboy sang nagakaigo ang ila campaign materials sa sulod sang lima ka adlaw pagkatapos sang eleksyon.
Sa interview sang Bombo Radyo kay Governor Defensor Jr., iya ginpahayag nga ang cleanup ang nagasunod sa Republic Act 9003, ukon sa Ecological Solid Waste Management Act sang 2000, nga nagapat-od nga ang proper waste collection kag paghaboy sang basura ang dapat ginasunod.
Suno kay Defensor, ang ila partido ang nagdeploy na sang salakyan ang agud makuha mga campaign posters kag tarpaulins. Maga-coordinate man sila sa mga LGU para suportahan ang inisyatibo.
Gin-athag man sini nga ang matipon nga mga materyales sa kampanya igahatag sa mga organisasyon nga nakabase sa komunidad agud i-upcycle sa mga bag, pouch, kag mga wallet.
Nagpirma si Gov. Defensor sang amo nga executive order pila ka oras antis ini ginproklamar bilang reelected governor sang probinsya sa iya ikatatlo nga termino.
