Kritikal ang isa ka babayi matapos gintiro sang iya utod sa Barangay, Tigmarabo, Miagao, Iloilo.
Ang biktima amo si Lee Ann Moro, 33, samtang ang suspek amo si Rodel Moro, 38, kag lunsay residente sang nasambit lugar.
Sa interview sang Bombo Radyo kay Police Major Richard Lao, hepe sang Miagao Municipal Police Station, iya ginpahayag nga nakabaton sila sang report nga may yara sang shooting incident sa nasambit nga lugar, kun sa diin gilayon man nila nga ginrespondehan.
Suno kay Lao, gilayon man sila nga nagpatigayon sang hot pursuit operation rason nga madasig nadakpan ang suspek.
Dugang pa sang natungdan, madugay na nga wala naga-ilintindihanay ang mag-utod, kun sa diin nagbaisay pa ini sila antes matabo ang nasambit nga insidente.
Ginkumpirmar man ni Lao nga wala sang bala kag mga basiyo nga na-recover sa ginluntaran sang insidente kag base sa pagpangusisa sang mga kapulisan sa suspek, ginhaboy niya ang pusil nga iya gingamit.
Sa subong, yara na sa kustodiya sang Miagao MPS ang suspek kag nagapangatubang sang kaso nga frustrated homicide.
