Nag-issue si Iloilo Governor Arthur Defensor Jr. sang Executive Order No. 42 nga naga-implementar sang “Limpyo Eleksyon for MoRProGRes”.
Sa interview sang Bombo Radyo kay Defensor, iya ginpahayag nga ang executive order isa ka post-election waste management program sang probinsya kun sa diin, nagamandu ini sa tanan nga mga kandidato, political parties, kag mga party-list organizations nga nagpartisipar sa eleksyon, nga magpakigbahin sa pagpanglimpyo kag tsakto nga paghaboy sang mga campaign materials nga ginpanggamit.
Suno kay Defensor ang proper collection kag disposal sang basura ang dapat sundon suno sa Republic Act 9003 ukon Ecological Solid Waste Management Act of 2000.
Nagmadu man si Defensor nga pangkakson ang tanan nga mga campaign materials nga nahamtang sa mga karsada kag pampubliko nga lugar.
Magluwas diri, ang Limpyo Eleksyon isa man ka pamaagi agud suportahan ang Balik-Alat Program sang gobernador nga nagaengganyo sa paggamit sang mga reusable kag eco-friendly nga basket, imbes nga single-use plastics.
Ang mga nakuha nga campaign materials ipaturn-over sa mga community-based organizations para i-upcycle kag himuon nga mga bag, pouch, kag wallet.
