Ginpasigurado sang Iloilo City Traffic and Transportation Management Office (TTMO) ang masangkad nga pagpangdakop sa mga motorista nga nagagamit sang modified muffler.
Sa interview sang Bombo Radyo kay Ret. Police Colonel Uldarico Garbanzos, head sang Traffic and Transportation Management Office, iya ginpahayag nga pasiguraduhon sang talatapan nga madakop ang mga nagabayolar sa existing ordinance sang syudad.
Suno kay Garbanzos, nagapakig-angot na ang talatapan sa Iloilo City Police Office (ICPO) agud nga mas mapabaskog ang pagbantay sa mga motorista nga may modified muffler.
May ginapatigayon man nga daily check point operation ang ICPO sa syudad agud nga indi makalusot ang kaangay nga motorista.
Dugang pa ni Garbanzos nga may ginapatuman man ang ila talatapan nga daily operation sang Lambat Sita kaupod ang Land Transportation Office (LTO).
