Kaangay sa mga kinaandan nga panawagan ni Pope Francis sang buhi pa ini, nagpangabay man si Pope Leo XIV nga tugutan nga makalab-ot sa Gaza ang ayuda kag mga pagkaon.
Sa tunga ini sang tuman nga gutom nga ginasuprer sang mga Palestino samtang nagapadayon ang gyera sang Israel batok sa militante nga Hamas.
Suno sa Santo Papa, ang kabataan, ang mga tigulang, kag ang nagabalatian amo ang nagabayad sa mga kunsekwensya sang mga kalakasan sa gyera.
Ini nga apelar sang Santo Papa ang ginhimo kadungan sang iya una nga general audience sa St. Peter’s Square sa Vatican.
Ang general audience sa kada Myerkules amo ang weekly appointment nga ginahimo sang Pope sa sulod na sang malawig nga tinuig kun sa diin may yara sang malip-ot nga reflection sa isa ka tema ukon Scripture passage. May summaries man nga ginahatag sa mga tumuluo kag nagahatag man ang Pope sa partikular nga mensahe sa nagkalain-lain nga grupo sang mga tumuluo.
Suno sa Vatican, 40,000 ka mga tawo ang nagtambong sa sini nga una nga weekly general audience sang newly-elected pontiff.#
