Gina-abi-abi sang Police Regional Office 6 (PRO-6) ang pagpili ni President Ferdinand Marcos, Jr. kay Police Major General Nicolas Torre III bilang chief sang Philippine National Police.
Sa interview sang Bombo Radyo kay Police Lieutenant Colonel Arnel Solis, Spokesperson sang Police Regional Office 6, iya ginpahayag nga committed nga magpakita sang suporta ang PRO-6 sa bag-o nga chief sang PNP.
Ini agud mapasangkad ang pagpatuman sang peace and order sa Western Visayas.
Dugang ni Solis, pananglitan nga may changes nga ipatuman ang bag-o nga PNP chief, bukas ang tatalapan nga sundon ang amo nga tikang.
Nagpabutyag naman sang pagpasalamat ang PRO-6 kay outgoing PNP Chief General Rommel Marbil sa nahatag sini nga bulig sa patag sang welfare sang mga kapulisan.
Si Torre ang nangin lider sang pila ka high-profile nga mga kaso, lakip na ang pagpangita kag pagkadakop kay televangelist Apollo Quiboloy sa Davao City, antes siya na-promote bilang hepe sang Criminal Investigation and Detection Group (CIDG).
Bilang hepe sang CIDG, siya man ang nagserbi sang warrant of arrest batok kay anay Presidente Rodrigo Duterte kasunod sang kaso sini sa International Criminal Court (ICC).
