Gin-aprubahan na sang Kamara sa third and final reading ang hagna nga ginduso agud nga ipatuman ang P200 nga saka sa daily wage sang minimum wage workers sa pribado nga sector sa pungsod.
171 ang boto sa affirmative, isa ang negative kag wala sang abstention agud mapasar sa plenaryo ang House Bill No. 11376 kahapon, Hunyo 4.
Kun mapirmahan na ni President Ferdinand Marcos, Jr. para nga mangin layi, ini ang mangin una nga legislated nationwide wage hike halin sang natabo ang Wage Rationalization Act sang 1989.
Ini nga bersyon sang Kamara sa legislated wage hike ang mas mataas sang P100 ipaanggid sa gin-aprubahan anay sang Senado.
Kinahanglan nga ma-reconcile sang Senado kag Kamara ang kinalain sini nga mga hagna paagi sa ila pagtipon sa bicameral conference committee, kag sunod nga ipasaka ang enrolled bill sa Malacañang para sa pirma sang president agud dalayon nga mangin layi.
Kinahanglan nga mahimo ini sang bicam antes ang Hunyo 13 nga amo ang katapusan nga session day sang 19th Congress.
“I appeal to all my fellow bicam conferees — my counterparts in the Senate and my colleagues in the House — let us get this done, and get it done now. We are way past the stage of whether we will pass a legislated wage hike, but how much that wage hike will be. For us workers, of course, the answer is clear: the higher, the better,” panawagan ni House Deputy Speaker Raymond Mendoza nga amo man ang Trade Union Congress of the Philippines (TUCP) representative.
Kun indi maratipikahan, magabalik naman sa puno kag i-file ini nga hagna sa masunod nga Congress.#
