Nagpositibo sa drug test ang dismissed police personnel nga naaresto anay sang City Drug Enforcement Unit (CDEU) sa Zone 1, Veterans Village, City Proper sang Huwebes, Hunyo 5.
Ang subject amo si Joel Destacamento Villaruel alias “Banog”, 58, kasado, kag residente sang nasambit nga barangay.
Ini ang may ranggo anay nga Police Staff Sergeant sa Regional Intelligence Unit kag na-dismiss sa serbisyo sadtong 2005.
Sa interview sang Bombo Radyo kay Police Captain Ryan Christ Inot, chief sang CDEU, iya ginpahayag nga ginapreparar na nila ang panumbungon nga ipasaka kay Destacamento kun sa diin posible ini magapangatubang sang complaint nga paglapas sa Republic Act 9165 ukon Comprehensive Dangerous Drugs Act of 2002 kag Republic Act 10591 ukon Comprehensive Law in Firearms and Ammunition.
Matandaan nga na-recover sa iya posisyon ang 100 grams sang suspected shabu nga may standard drug price nga P680,000 kag replica sang mga armas, airsoft, pito ka bala sang .45 caliber, kag walo ka bala sang 22 caliber.
Apisar nga replica sang armas ang nakuha, magapangatubang ini sa gihapon sang kaso bangud makatuga ini sang pagkapuhag sa publiko.
Nahibaluan nga may yara anay sang record si Villaruel may kaangtanan man sa iligal nga droga sadtong September 2020 sa Molo, Iloilo City apang nakatigayon ini makaguwa sang tuig 2022 bangud na-dismiss ang kaso.
(Article: Bombo Phauline Pillora)
