Gin-anunsyo ni Assistant Secretary Jocelyn Andaya sang Department of Education (DepEd) nga ginapaabot nila ang mga 27 million ka enrollees halin sa preschool tubtob senior high school para sa School Year 2025-2026.
Tungod sa padayon nga pagdamo sang populasyon sang mga estudyante, ginpahayag ni Andaya nga ginapadayon sang DepEd ang mga tikang para solusyunan ang kakulangan sa mga classroom.
May kakulang sang 165,000 ka classroom ang pampubliko nga edukasyon, kag ini ginapaninguhuan sang DepEd nga masolusyunan paagi sa kooperasyon sang gobyerno kag pribado nga sektor (public-private partnership).
Suno kay Andaya, ginaplano nga makadugang sang 105,000 ka bag-o nga classroom, kag i-prayoridad ini paagi sa pag-una sang mga procurement activities nga ginaduso.
Gin-anunsyo man sang DepEd nga ila pagahiwaton ang Oplan Balik Eskwela, lakip na ang Brigada Eskwela, halin Hunyo 9 tubtob 13.
Ang Brigada Eskwela nagatuyo nga mapaayo ang kahimtangan sang mga eskwelahan kag mga classroom. Nagapadayon man ang kooperasyon upod sa iban nga sektor sang gobyerno, upod man ang pribado nga sektor, agud limpyuhan kag makid-an ang mga eskwelahan.
Ini nga programa nagatuyo nga mapaayo ang kondisyon sang mga classroom.
