Balantayan 8:00 subong nga aga oras sa Pilipinas ang Game 2 sa National Basketball Association (NBA) Finals sa tunga sang Oklahoma City Thunder kag Indiana Pacers.
Patigayunon ini gihapon sa Paycom Center nga home court sang Thunder.
Matapos ang upset nga nahimo sa Game 1, tuyo ni Tyrese Haliburton kag Pacers nga pasagunsunan ini subong nga adlaw kag makuha ang 2-0 series lead antes dal-on ang finals sa Indianapolis sa state sang Indiana.
Sang Byernes (PST), napanas sang Pacers ang 15-puntos nga abanse sang Thunder sa fourth quarter. Nangin highlight naman ang game-winning shot ni Haliburton sang 0.3 seconds ang nabilin sa hampang nga amo ang nagpadaog sa Indiana, 111-110.
Determinado naman ang Oklahoma sa pagpanguna sang star point guard kag newly crowned Most Valuable Player (MVP) nga si Shai Gilgeous-Alexander nga makabawi matapos nakalusot ang Indiana sa Game 1.
Sa una nga hampang, nakahimo si SGA sang 38 puntos, five rebounds, three assists kag three steals. Ini nga 38 puntos amo ang ikatatlo sa pinakamataas nga na-skor sa NBA finals debut sang isa ka player kasunod sang nahimo nanday Allen Iverson nga may 48 points kag George Mikan nga may 42 points.
