Pormal na nga nagpanumpa si Senate President Francis Escudero bilang presiding officer sang impeachment court sa trial ni Vice President Sara Duterte.
Sa plenary session subong nga gab-i, gin-adoptar man sang Senado ang mosyon ni Sen. Joel Villanueva nga ang iban nga mga senador ang maga-sumpa alas kuatro sa hapon buwas, Hunyo 10, bilang senator-judges sa impeachment trial.
Sa iya man nga motion, ginsulit ni Villanueva nga kun makasumpa na ang mga senador, “constituted” ang court, apang indi pa “convened.”
Pormal nga maga-convene ang upper chamber bilang impeachment court sa Myerkules, Hunyo 11.
Antes sini, ginbotohan sa chamber nga i-refer ang verified impeachment complaint batok kay Duterte sa committee on rules.
Si Villanueva ang nag-mosyon para sa referral matapos nga gin-suspend anay ang session agud istoryahan ang nauna nga motions ni Senator Minority Leader Aquilino “Koko” Pimentel III agud kuntani iduso nga mag-convene na insigida ang Senate bilang impeachment court.
Matandaan nga Hunyo 2 kuntani orihinal nga naka-schedule ang presentasyon sang prosecution panel sang articles of impeachment sa Senado, apang ginsaylo ini ni Escudero sa Hunyo 11 bangud kinahanglan unahon ang “priority legislative measures” antes magtakop ang 19th Congress.#
