Nagpaguwa sang statement ang Supreme Leader sang Iran nga si Ayatollah Ali Khamenei kasunod sang pagpang-atake sang Israel kahapon sang aga.
Pahayag sini, ginsuguran sang Israel ang giyera kag indi sila magtugot nga palagyuhan lang sang amo nga pungsod ang ila ginhimo nga pagpang-atake. Dugang ni Ali Khamenei, may yara gid ini sang “grave consequences.”
“The Zionist regime (Israel) will not remain unscathed from the consequences of its crime. The Iranian nation must be guaranteed that our response will not be half-measured,” kabahin sang iya statement.
As of press time, may retaliatory attacks na nga ginahimo ang Iran.
Wala sang tulog ang mga residente ilabi na sa Tel Aviv kag sa Jerusalem samtang nagasinigabong sa ila palibot.
“Life will become bitter for them, without a doubt. They should not think they struck and it’s over — no. They started this and triggered a war. We will not allow them to walk away unscathed from the great crime they have committed,” kabahin pa sang pahayag sang Iranian Supreme Leader.
Ginkumpirma naman sang Israeli rescuers nga may pito ka mga tawo nga napilasan bangud sa Iranian missiles, apang sa separado nga reports, 40 na ka mga tawo ang ginapangbulong sa Israeli hospitals.
Makit-an sa isa ka footage nga gin-igo ang isa ka high-rise building sa amo nga syudad.
Suno sa Iran, ginatos ka ballistic missiles ang ila nga ginpa-ulan; apang sabat naman sang Israeli military, indi gani maglab-ot sa 100 ka missiles ang nalunsar sang Iran kag gamay lamang ang nag-igo.
May impormasyon man nga nagbulig ang United States agud nga ma-intercept ang Iranian missiles; kag may iban pa nga mga pungsod sa Middle East nga nagbulig man sa Israeli air defenses.
Ini nga atake sang Iran ang natabo matapos nga nga ginbombahan man sang Israel kahapon sang aga ang Iranian nuclear sites kag ginguba man ang ila nga military leadership sa Tehran. Gintawag ini sang Iran nga deklarasyon sang gyera.#
