Ginkumpirma sang Department of Foreign Affairs (DFA) nga may apat ka mga Pinoy nga nasamaran kag gindala sa ospital matapos naigo sang airstrikes sang Iran sa Israel.
Halin ang apat ka mga indibidwal sa syudad sang Rehovot suno kay DFA Undersecretary Eduardo De Vega.
Wala pa sang ginpaguwa nga impormasyon ang ahensya kun taga-diin ini nga mga Pinoy sa Pilipinas kag kun kamusta ang ila kondisyon subong.
Magluwas sa ila, may 12 ka iban pa nga mga Pinoy nga yara sa parke sang nagtupa ang Iranian missiles sa area. Ginahibalo pa sang opisyal kun ngaa yara sila sa parke, kag kun bala nagguwa sila bangud sa kahadlok ilabi na bangud may missiles nga makalusot sa iron dome.
Magluwas sa ila, may isa man ka Pinay nga nadulaan sang puluy-an kag subong nagatinir anay sa isa ka hotel.
Naigo sang missiles ang iya balay sa Ramat Gan sa west sang Tel-Aviv sandig sa impormasyon halin sa Philippine Embassy in Israel. Nakaluwas ang amo nga babaye bangud nga yara siya sa bomb shelter ukon mamad sang nagtupa ang missile.
Sa subong, ginatun-an pa sang embahada sang Pilipinas kun ipatuman ang voluntary ukon mandatory repatriation.
Santo sa DFA, may yara sang 30,000 ka mga Pilipino sa Israel. Pananglitan may matabo nga evauation, magaagi ang mga Pilipino sa Allenby Bridge pakadto sa Jordam.
Sa pihak nga bahin, 1,100 naman ang mga Pinoy sa Iran apang wala sang na-report nga injured ukon nag-request sang assistance.
Nag-ibwal ini nga tension sa Middle East matapos nga nagpalupad ang Israel sang missiles sa Iranian military assets kag personnel, rason nga nagsunod-sunod man ang balos sang Iran sa Israel nga nagdalahig na sang kabuhi sang mga sibilyan.#
