Gin-ako ni President Ferdinand Marcos Jr. nga napaslawan ang K-12 education program nga malab-ot ang mayor nga katuyuan sini nga ipreparar ang mga Pilipino nga estudyante para sa trabaho.
Suno sa presidente, sa baylo, nagdugang lang ini sa pinansiyal nga kabudlay sang mga ginikanan nga napilitan nga pas-anon ang dugang nga duha ka tuig sa pag-eskwela sang ila kabataan.
Nagpahayag man sang suporta ang Presidente sa concerns sang mga mamalidha kalakip na si Senator Jinggoy Estrada nga nagapanawagan sang pagkakas sang mandatory senior high school system sa idalom sang K-12 framework.
Apang gin-athag niya nga ano man nga pagbag-o sa programa, magadepende ini sa Kongreso.
Sa pihak sang mga concerns, ginsiling ni President Marcos nga samtang magapabilin ang K-12, kinahanglan nga mapanami sang Department of Education ang implementasyon sini.
