Nanginwala si former presidential spokesperson Harry Roque nga ginbasura sang Netherlands ang iya nga aplikasyon para sa asylum.
Pahayag ni Roque, confidential nga bagay ang iya nga asylum bid, kag kun may desisyon man ang gobyerno kaangot diri, siya kag ang Dutch government lamang ang makahibalo.
Dugang niya, wala sang database nga kuhaan sang anuman nga update kaangot sa iya nangin petisyon.
Ginplastar man sini nga uniform ang procedure sa asylum application sa bilog nga kalibutan, kag nakahibalo siya sini bangud may nauyatan man siya anay nga kaangay sini nga mga kaso sang diri pa siya sa Pilipinas.
Ini nga pahayag ni Roque ang kasunod sang statement ni Justice Secretary Jesus Crispin Remulla nga gin-deny sang Netherlands ang iya application kag yara na ini subong sa Germany.
Dugang sang Justice official, kun ma-kanselar na ang passport ni Roque, mahimo ini nga “undocumented alien” kag pagadakpon sang International Criminal Police Organization ukon Interpol.
Sa statement naman nga gin-release ni Roque, nagpahayag ini nga nagbyahe siya sa Germany matapos na-imbitahan sang mga Pinoy kun sa diin nagpanguna siya sa oathtaking ceremony sang mga myembro sang “Hakbang ng Maisug Germany.” Pahayag sini, nakabalik na siya subong sa The Hague.
Nahibaluan nga may standing arrest warrant si Roque diri sa Pilipinas kaangot sa kaso nga qualified human trafficking nga gin-file sang DOJ bangud sa ginaalegar nga kaangtanan sini sa iligal nga operasyon sang Philippine offshore gaming operator (Pogo) kag ginaalegar nga scam hub nga Lucky South 99 sa Porac, Pampanga.
