Ginbasura sang Supreme Leader sang Iran ang panawagan sang Estados Unidos sang Amerika nga mag-surrender na lang ini sa away sini batok sa Israel.
Ginpahayag ini ni Ayatollah Ali Khamenei paagi sa isa ka video message matapos ang statement ni US President Donald Trump nga mag-sungka na lang ang Iran nga wala na sang mga kondisyon.
Sa nauna nga pahayag ni Trump, ginsiling sini nga nakahibalo sila kun sa diin subong ang Supreme Leader, apang wala sila sang plano nga patyon ini sa subong.
Bisan naga-distansya si Trump sa isyu sang pagbaslanay sang Israel kag Iran sang missile attack, ang iya mga pahayag sini nga mga inadlaw ang nagahatag sang patimaan nga maga-intra ang Estados Unidos, ilabi na bangud nagpadala ang US sang dugang nga military aircraft kag warships sa Middle East.
Sabat naman sang 86-anyos nga si Khamenei, kilala sang mga maalam nga tawo ang Iran nga wala naga-surrender, kag indi sila dapat pagpaagyan sang mga statement nga may unod nga pagpamahog.
“Intelligent people who know Iran, the Iranian nation and its history will never speak to this nation in threatening language because the Iranian nation will not surrender,” kabahin sang recorded speech sang Iranian Supreme Leader.
Nagpaandam ini nga kun mag-intra ang militar sang Amerika, maga-resulta ini sa halit nga indi sarang makaayo.
Indi gihapon maathag subong kun sa diin si Khamenei, kag sa iya nga video nga naka-tight shot, makit-an lamang ang kurtina, hayahay sang Iran, kag ang laragway ni Grand Ayatollah Ruhollah Khomeini nga napatay sang 1989.
Antes sini nga statement, nagpahayag man si Iranian Foreign Ministry spokesman Esmail Baghaei nga kun mag-intra ang US sa gamo sang Israel kag Iran, maga-resulta ini sa all-out war.
