Gin-anunsyo sang Israel nga naglab-ot na sa katunga sang missile launchers sang Iran ang ila natigayon nga naguba samtang nagapadayon pa ang missile strikes sa isa kag isa.
Suno ini kay Eyal Zamir nga amo ang pinuno sang General Staff sang Israel Defense Forces (IDF).
Sa iya recorded message, gindayaw man sini ang strikes sang militar sang Israel sa Iran nga suno sa iya may dalayawon kag impresibo nga resulta. Ginpadayaw sini nga naguba nila ang senior military command sang Iran kag nahalitan man ang ila nga nuclear program.
Ginguba man suno sa Israel ang Iranian surface-to-air missile batteries kag ginabanta nga katunga sang ila nga missile launchers.
“Thanks to a powerful and surprising opening strike, we achieved extraordinary results,” kabahin sang iya nga mensahe.
Ginpasalig sini nga preparado ang mga piloto sang Israeli Air Forces sa padayon nga pag-atake sa Iran.
Pahayag ni Zamir, naangot man gihapon ang ila pag-atake sa 53 ka mga nabilin nga bihag nga gindala sang Hamas halin pa sang Oktubre 2023.
Nahibaluan nga isa ka semana na nga may baslanay sang missile strikes sa tunga sang duha ka nasambit nga mga pungsod sa Middle East.#
