Gintawag sang Bagong Alyansang Makabayan (Bayan) Panay nga alibi gid lamang ang Iran-Israel conflict sa pagpasaka na naman sa presyo sang gatong.
Sa interview sang Bombo Radyo kay Mr. Elmer Forro, Secretary General sang amo nga organisasyon kag nagaserbe man nga lead convenor sang No to PUV Phaseout Coalition Panay, iya ginpahayag nga antes pa man ang mataas nga tension sa Middle East, may sunod-sunod na nga daan nga price hikes sa produktong-petrolyo.
Dies porsyento lang sang oil supply sang Pilipinas ang nagahalin sa Iran suno kay Forro; kag kun may kaangay sini nga tensyon, madamo pa sang mahimo kuhaan ang pungsod.
Suno pa kay Forro, katungdanan kuntani sang gobyerno nga ipasiguro nga indi mabutang sa alang-alang ang interes sang mga pumuluyo sa tunga sang pagsinaka sang oil prices.
Lakip sa panawagan sang grupo amo nga repasuhon sang gobyerno ang Oil Deregulation Law para mabalik ang regulatory powers ukon control sang gobyerno sa oil industry.
Ginapanawagan man sang organisasyon ang pag-suspinde sang excise tax agud mapunggan ang pagtimbuok sang presyo sang gatong.
Base sa forecast nga ginpaguwa sang Department of Energy (DOE), posible ang price hike nga P3.30 – P3.50/L sa gasolina; P5.00 – P5.20/L sa diesel; kag P4.50 – P4.70/L sa kerosene.
Balantayan ang pag-anunsyo sang final price adjustment buwas, Hunyo 23. Ipatuman ini epektibo sa Martes sang aga.#
