Ginkumpirmar sang Kremlin nga nag-istoryahanay paagi sa telepono si United States President Donald Trump kag Russian President Vladimir Putin.
Lakip sa ila gin-diskusyonan amo ang Iran, Ukraine kag iban pa nga mga isyu.
Ginplastar sang Russian leader nga kinahanglan nga resolbahon ang mga isyu paagi sa pulitikal kag diplomatiko nga paagi.
Matandaan nga ginbombahan sang Estados Unidos ang tatlo ka nuclear sites sa Iran sang Hunyo 22 sang kasagsagan sang gyera sang Tehran batok sa Israel.
Sa bahin naman sang giyera sa Ukraine, ginpabutyag ni Trump nga luyag na sini tapuson gilayon ang away, samtang si Putin ang nagpahayag naman nga bukas ang Moscow sa negosasyon kaupod ang Kyiv.
Ginpa-athag man ni Putin nga ang Russia padayon nga magahimo sang mga tikang agud malab-ot ang ila mga target sa Ukraine kag kakson ang ginatawag niya nga “mga ginhalinan” ukon root cause sang away.
Ang pag-istoryahanay sang Huwebes natabo pagkatapos ginkumpirmar sang Pentagon nga ginpauntat anay ang pagpadala sang pila ka mga armas padulong sa Ukraine samtang ginarepaso ang military stockpile sang U.S. Lakip sa ginpaiway nga ipadala sa Ukraine amo ang air defense missiles, precision-guided artillery kag iban pa nga equipment.
Sa Denmark naman, ginpahayag ni Ukrainian President Volodymyr Zelenskyy nga posible siya makig-istorya kay Trump sa palaabuton nga mga adlaw parte sa pagpauntat sang U.S. weapons deliveries.
