Ginpangabay ni Senador Raffy Tulfo ang Department of Migrant Workers (DMW) nga padayunon ang beripikasyon kag imbestigasyon sa na-report nga pag-atake sang Houthi rebels sa isa ka Greek-owned bulk carrier Eternity C nga ginakabig may sakay nga mga Pilipino nga seafarers samtang nagalabay sa Red Sea sang Hulyo 7.
Bilang chairman sang Senate Committee on Public Services, ginpahayag ni Tulfo ang kabalaka sa kahimtangan sang mga Pilipinong marino nga sakay sang nasambit nga barko.
Suno sa iya, importante nga padayunon ang monitoring sa kondisyon sang mga Pinoy seafarers agud matigayon dayon ang paghatag sang ayuda sang gobyerno kag makapahamtang sang rescue operations kun kinahanglan, agud masiguro ang kalinong sang ila mga pamilya diri sa Pilipinas.
Bangud sa nagapadayon nga kahangawa sa Red Sea, lakip na ang sunod-sunod nga mga pag-atake sa mga barko sa sulod sang duha ka tuig.
Ginpahayag ni Tulfo nga dapat konsiderahon sang DMW ang temporaryo nga pagdumili sang deployment sang mga Pilipinong marino sa mga barko nga nagaagi sa lugar.
Imbes sini, ginpanugyan niya nga ibutang sila sa mga barko nga nagaagi sa mas hilway kag mas safe nga mga ruta pandagat.
Base sa report sang European Union Operation Aspides kag private security firm nga Ambrey, gin-atake sang Houthi rebels ang Eternity C gamit ang mga bangka kag drones nga may bomba samtang pa-Norte ini padulong sa Suez Canal.
Suno kay DMW Secretary Hans Leo Cacdac, 21 sa 22 nga crew sang barko amo ang mga Pilipino, upod na ang kapitan.
Apang, ginpaathag niya nga wala pa sang pinal nga kumpirmasyon kun may yara sang napatay, nasamaran, ukon nadula.
Padayon karon ang pag-validate sang impormasyon sang Defense Attache sa Bahrain upod ang UK Maritime Trade Operations (UKMTO) kag ang principal operators sang barko nga Cosmoship kag LMA Status Maritime.
