Ginaimbestigaran na subong sang City Social Welfare and Development Office (CSWDO) sa Lapu-Lapu City, Cebu ang insidente kun sa diin makit-an ang video sang 60-anyos nga lola nga ginalumsan ang 12-anyos nga apo sa baha sa Sitio Balanghoy, Barangay Gun-ob sa amo nga syudad.
Apisar natabo pa ini sang Marso, nagtuhaw liwat ang video kag madamo ang nagpakamalaot sa ginhimo sang lola.
Suno sa CSWDO, nagpadala sila sang personnel agud mag-imbestigar.
Sa ila pagsugilanon sa lola, gin-ako niya nga naugot siya sa batasan sang iya apo kag nahimo lamang niya ini para disiplinahon ang bata.
Gina-assess na subong kun kinahanglan nga ipalayo anay ang bata sa iya lola.
Pahayag sang CSWDO, ibase nila ang ila desisyon sa kun ano gid ang pinakamaayo para sa bata.
