Gina-istriktuhan sang Western Visayas Transport Cooperative (WVTC) ang ila mga driver kag konduktor nga indi pagpasobrahan sa 10 ka mga pasahero ang tugutan nga magtindog sa sulod sang modernized jeep.
Ini ang kabahin sang pag-comply sa Anti-Sardinas policy sang gobyerno ukon polisa batok sa pagginutok sa mga public utility vehicles.
Sa interview sang Bombo Radyo kay Mr. Boyet Parcon, chairman sang amo nga kooperatiba, iya ginpahayag nga patakaran na sa ila nga mga Passenger Assistant Officer nga 10 lang gid ang tugutan nga magtindog, kag papanaugon na ang ulihi-saka nga pasahero nga sobra na sa kapasidad sang unit.
Suno kay Parcon, dapat man hangpon sang mga pasahero ilabi na sa peak hours nga may salabton man ang mga konduktor pananglitan madakpan nga naga-cater sang mga commuter nga sobra na sa capacity.
Pananglitan matabo ini suno kay Parcon, mahimo gid makuha ang bus number kag i-report sa management ukon sa kooperatiba agud nga maka-akto man sila ukon maka-isyu sang warning.
“Ang aton diri nga ang comfort sang mga pasahero kay te nagsakay gani sila sa modernized jeep nga aircon kag makapungko sila sang maayo. Gina-disseminate gid naton sa mga drivers kag conductor nga indi gid magsobra sa 10 ang standing,” suno kay Parcon.
Matandaan nga nagpahanumdom ang Department of Transportation (DOTr) sang implementasyon sang ‘Anti-Sardinas’ policy nga sunod man sa direktiba ni President Ferdinand Marcos, Jr. para masiguro ang safe kag convenient nga public transportation.#
