Nagpahayag si Iranian Foreign Minister Abbas Araqchi nga handa ang Iran nga magkooperar sa International Atomic Energy Agency (IAEA) sa pihak sang ginpatuman nga bag-o nga layi sang ila parliament nga nagauntat sang direkta nga inspeksyon sa nuclear facilities sang pungsod.
Suno kay Araqchi, limitado lamang ang ila kooperasyon sa nuclear program, kag indi ini magalab-ot sa isyu sang defense system, lakip na ang mga missile development nga ginapanindugan sang Iran nga kabahin sang ila national security.
Ginpasar ang layi kasunod sang pagpangbomba sang Israel kag Estados Unidos sa pila ka nuclear facilities sa Iran, nga kabahin sang nagapadayon nga tensyon sa Middle East.
Sa idalum sang bag-o nga patakaran, ang mga inspeksyon sang IAEA sa nuclear sites kinahanglan na sang approval sang Supreme National Security Council, nga amo ang pinakamataas nga security body sang Iran.
Samtang ginapanindugan sang Western countries nga ang Iran may plano nga maghimo sang atomic weapon.
Ginpasalig naman sang Iranian government nga ang ila nuclear program ang indi delikado.
Apang ginpahayag man sang mga eksperto nga delikado ang magkadto sa bombed nuclear sites bangud sa posibilidad sang chemical contamination kag security threats.
Padayon ang panawagan sang international community sa Iran nga magpabilin nga transparent kag mag-aplikar sang full cooperation sa mga inspeksyon agud malikawan ang dugang nga tensyon kag posible nga military conflict.
