Nagpangabay sang klaro nga koordinasyon ang Iloilo City Local Government Unit (LGU) sa Department of Public Works and Highways (DPWH) matapos ginbuyagyag nga may proyekto ang ginpatuman nga wala sang konsultasyon sa lokal nga pamunuan.
Sa interview sang Bombo Radyo kay Joy Fantilaga-Gorzal, tagpamaba ni Iloilo City Mayor Raisa Treñas, ginpahayag nga nagpakigsapul si Engr. Joel Limpengco, Officer-in-Charge sang DPWH Region VI kay Mayor Treñas para istoryahan ang mga isyu nga ginbanggit sang anay alkalde nga si Jerry Treñas sa iya social media post.
Lakip sa ginpunto amo ang kakulangan sang koordinasyon sa mga proyekto sang Iloilo City District Engineering Office, nga halos tanan wala sang klaro nga kasugtanan sa LGU antes pa man magsugod.
Ginklaro sa sinapol nga dapat may koordinasyon gid ang DPWH sa lokal nga gobyerno antes magpatuman sang ano man nga proyekto, lakip na ang mga barangay kag stakeholders nga posible maapektuhan.
Ginmention man ni Gorzal nga ang bike lane/revetment wall project sa Jaro, nga ginpatuman ni Congresswoman Jamjam Baronda, ginausisa na subong kun may environmental compliance kag epekto sini sa pagbaha, kag nagpadala na sila sang sulat sa DENR para sini.
