Nagtaliwan na sa edad nga 87-anyos ang iconic American pop singer nga si Connie Francis nga kilala sa hits kaangay sang “Who’s Sorry Now?” kag “Pretty Little Baby.”
Ginkumpirma ini sang iya suod nga abyan kag record label president nga si Ron Roberts.
Antes ang iya kamatayon, na-ospital pa si Connie bangud sa ginbatyag nga “extreme pain.”
“It is with a heavy heart and extreme sadness that I inform you of the passing of my dear friend Connie Francis last night,” post ni Roberts nga gin-share sa official Facebook page ni Connie. “I know that Connie would approve that her fans are among the first to learn of this sad news.”
Nabun-ag si Connie bilang si Concetta Franconero sa Newark, New Jersey sang 1937.
Bata pa lamang, performer na ini. Sang 1957, gin-record sini ang “Who’s Sorry Now?” nga nangin breakout hit matapos nga gin-ere sa “American Bandstand” sang 1958.
Halin sa amo nga tuig, nangin isa siya sa best-selling female vocalists sang late 1950s kag early ’60s nga may mga kanta nga chart-toppers kaangay sang “Everybody’s Somebody’s Fool” nga amo ang una nga No. 1 sa Billboard Hot 100 sang solo female artist.
Nangin viral hit man ang “Pretty Little Baby” masobra anum ka dekada matapos nga nakit-an kag nabatian ini liwat sa TikTok videos subong nga henerasyon.
Magluwas sa musika, nakit-an man si Connie sa mga pelikula kaangay sang “Where the Boys Are” (1960). Duha ka memoirs ang iya nabalhag nga amo ang “Who’s Sorry Now?” (1984) kag ang “Among My Souvenirs” (2017).
